2009-це иень январень 13-це чистэ Российской Федерациянь Президентэсь Д.А. Медведев сёрмадстызе «Российской государствань лия раськетнень марто эрзятнень ды мокшотнень малавгавтомань 1000 иетнень тешкстамодо» Указонть.
Весе Россиянь финнэнь-угрань прессань фестивалесь, кона ютась 2010 иень сентябрянь 23-24-це читнестэ, Мордовиянь прявтошсо пурнакшнынзе весе масторсто раськень изданиянь журналисттнэнь. МР-нь Прявтось Н.И. Меркушкин, Россиянь финнэнь-угрань движениянь активисттнэнь ютксто вейкесь, вастневсь форумов сыцятнень марто Республикань Кудосо. Вастовомась ютась ялга-ялгань марто кортамонь форматсо. Кавтодо ламо часонь перть финнэнь-угрань журналисттнэ ды республикань СМИ-нь корреспонденттнэ макснесть МР-нь Прявтонтень кевкстемат.
Мордовия Республикась – Россиянь Федерациянь пелькс (субъект). Ашти масторонь Европань пелькссэнть, сови Равчирень федеральной округонтень. Прявтошозо – Саранск ошось. Теезь 1930-це иень январень 10-це чистэ кода Мордовской автономной область. 1934-це иень декабрянь 20-це чистэ яволявтозь Мордовской АССР-кс. 1991-це иестэ саезь ульнесь Мордовской ССР-кс. 1994-це иестэ лемдезь Мордовия Республикакс. 1995-це иень мартонь 30-це чистэ Мордовиянь Государственной Собраниясь (парламентэсь) кемекстынзе республикань гербенть ды флагонть. 1995-це иень сентябрянь 21-це чистэ Мордовия Республикань Конституционной Собраниясь кемекстызе неень уликс Конституциянть.
Эрзятне ды мокшотне – Россиянь кезэрень раськетнестэ вейкесь. Эйстэнзэ васенце сёрмадовкстнэ теезь У1-це пингестэ (Иордан). Эрзянь ды мокшонь кезэрень буетне эрясть славянонь буетнень малава. Славянонь васенце эрицятне човорявсть юткозост минек эрань 1-це тёжтиенть прядовомсто. Сестэ саезь ушодовияк тёжа иень перть рузонь ды эрзянь-мокшонь раськетнень вейсэ эрямост.
